monumenta.ch > Hieronymus > sectio 17 > sectio 31 > sectio 1 > sectio 30 > bsbClm6224.177 > sectio > sectio 63 > sectio 32 > sectio 9 > 25 > sectio 10 > uwbM.p.th.f.68.190 > sectio 22 > sectio 7 > sectio 25 > sectio 68 > bsbClm6224.182 > csg48.204 > sectio 24 > sectio 14 > sectio 96 > sectio 5 > sectio 83

Word Selection for Searching

Report an Error in this Sectio Magnify Greek
Hieronymus, Commentarii, in Danielem, 11, 83
Et Deum patrum suorum non reputabit, et erit in concupiscentiis feminarum: nec quemquam deorum curabit, quia adversum universa consurget. Deum autem MAOZIM in loco suo venerabitur; et Deum quem ignoraverunt patres eius, colet auro et argento, et lapide pretioso, rebusque pretiosis. Et faciet ut muniat MAOZIM cum deo alieno quem cognovit, et multiplicabit gloriam, et dabit eis potestatem in multis, et terram dividet gratuito. Pro eo quod nos interpretati sumus, et erit in concupiscentiis feminarum, LXX transtulerunt, et concupiscentiis mulierum non subiacebit. Rursum pro Deo MAOZIM, quod habetur in Hebraico, Aquila transtulit, Deum fortitudinum; LXX, Deum fortissimum. Quia vero in Hebraico pro eo, quod nos diximus: et erit in concupiscentiis feminarum, ambigue positum est, dicente Aquila, qui verbum expressit e verbo: καὶ ἐπὶ Θεὸν πατέρων αὐτοῦ οὐ συνήσει, καί ἐπὶ ἐπιθυμίαν γυναικῶν, καὶ ἐπὶ πάντα θεὸν οὐ συνήσει, id est, et super Deum patrum suorum non intelliget, et super concupiscentiam feminarum, et super omnem Deum non intelliget. Quibus verbis intelligitur habere eum concupiscentiam feminarum, et non habere.